神偷與司令—我仲有無資格講鐘意香港？

作者: Noir
相片: Julia Wood

威威司令和漢堡神偷倆都說，既然都來到加拿大，過去了的很多事、香港的事，如無必要，都不想提起，不想討論。不過遇上別人批評示威者，或對這場社會運動有誤解，兩人還會忍不住要說上兩句。有些時候漢堡神偷會暗地怪責自己認識得不夠深入，不夠全面，以至在跟其他人討論香港的情況時，未能有更充分的理據。雖然親眼目睹過警察打人、示烕者被捕，也遇上過開門讓她們進去逃避追捕的店舖老闆，經歷街頭上手足之間的互相照應、彼此相知，又發掘了重慶大廈不為人知的一面。兩人都表示從沒有後悔參與這場運動，更異口同聲地道：「嗰個時候嘅香港真係好特別。」

“其實就是因為絕望所以才離開”

威威司令形容自己本來是「港豬」，她說：「我唔算真係好熟悉香港，細個嘅時候比較黐家，連屋企附近嘅街名也未必分得清楚。」但雨傘運動的時候，她有到場支持，到反送中，社會運動更成了大學生活的一部分。然而，她承認：「但會唔會再出去呢？就真係未必。做了當時覺得仲可以做嘅事，但咁樣唔代表無絕望的感覺。」她淡然一笑：「其實就是因為絕望所以才離開。」漢堡神偷則回應：「我唔肯定。當時喺feel到嗰啲係應該做嘅事所以做，如果再有咁嘅諗法，我都會行動。」不過，離港的視野亦叫漢堡神偷思考：「嚟到先發現，世界每天都有事發生，呢邊每星期都有唔同嘅群體遊行，令我會去問，我哋遊行、發聲、表達訴求，有邊嗰聽到，有咩人真係會留意？」

到步的第10天，漢堡神偷因事去了downtown，機緣巧合下才知道了當日有聲援香港的遊行。她說：「個一刻嘅感覺好難形容。」她指著自己：「香港人喎？我咪係香港人囉，仲要係啱啱喺香港嚟嘅香港人添。明明應該好關事，但自己竟然可以一無所知。」她帶點無奈道：「不過，唔知就係唔知。同呢邊嘅團體無聯繫，收唔到資訊；突然之間，有種自己唔屬於呢度嘅感覺。」漢堡神偷回想：「喺香港嘅時候，所有嘢都好即時，好同步。做嘅嘢，有咩行動，幾個鐘後就已經會喺新聞、social media上面睇到。呢啲活動，根本唔使刻意揾都會知。」

“對於香港，無話喜唔喜歡，捨唔捨得，那是我成長的地方，有感情寄託。但唔喺留低就可以改變到啲咩。所以，放過自己，出走，抖抖氣。”

儘管如此，漢堡神偷覺得：「呢場社會運動，自己係有參與，但好多方面都好似做得唔夠徹底。」有一段日子，被捕、被毆打成了指標，身邊的人都在比較誰為運動付出得多。威威司令卻反問：「其實同人比較，話自己做過咩、受過咩又有咩意思呢？」自社會運動成為生活的一部分以後，威威司令就一直無再乘搭地鐡，然而她身邊就有一位走得比她前的手足仍然需要依賴地鐵出入。過於片面的判斷，卻成了自我審查的壓力，威威司令說：「唔知幾時開始，好驚做或唔做任何嘢，都會觸動其他人嘅神經。」過來加拿大就是想逃避一下香港那邊壓抑的氛圍，威威司令說：「對於香港，無話喜唔喜歡，捨唔捨得，那是我成長的地方，有感情寄託。但唔喺留低就可以改變到啲咩。所以，放過自己，出走，抖抖氣。」說到底，未敢輕言對香港的感情，是因為「我哋真係好鍾意香港」絕對不能廉價；這一分重量叫威威司令自我拷問：「究竟我有幾鐘意香港？如果真係鐘意，咁又離開？離開咗，就即係放棄咗。係咁嘅話，我仲有無資格講我鐘意香港？」

先將身心都休養好
再出發 再面對崩塌
若沒有壯健體魄
要怎對抗 世界每天的荒誕

陳蕾：〈世界與你無關〉

---

漢堡神偷*， 威威司令* - 化名